John 4
E Ieesuß To Vavaato Me Non A Köövo Va Samëriaß
1O Parësiß to pënton ee pan e Ieesuß to pupui a nap peo, ka nap peo poë varih tavus ee o vamomhë peß. Kee peo oah ee pa ma teß vamomhë pe Jon. Ivëhkëk, eß to hikta teß non pan e Ieesuß ivëh to pupui non a napan, ahik, o vamomhë koman peß ivarih to pupui ne pa napan pa ruen. Ke Ieesuß nat poß en po Parësiß to pënton ee pa nap peo rakah to tavus ee o vamomhë peß. Ivëh, neß to këh suk a muhin va Jiutiaß, pareß hah en pa muhin va Galiliß. 4Ivëhkëk, a hanan neß to suk to koe ke non manih pa muhin va Samëriaß.5Manih pa koman a muhin va Samëriaß ne Ieesuß to nö, pareß vos en manih pa vöön nee to pokaß ne Sikar. A vöön pamëh to teß vatët non po oeh ne Jekop to heß voh e sunaißeah Jeosëp. 6A tah to matan va non manih pa 12 kirök pa topnin potan ne Ieesuß to me nönö nö, pareß pak ko ihoß en pa sinten a koveß ruen pamëh. Ka koveß ruen pamëh eß a koveß ruen ne Jekop to een voh.
7E Ieesuß teß non nën, ka köövo va Samëriaß nö en maß pa isu a ruen manih pa koveß ruen pamëh. Ke Ieesuß soe ke poan pan, “Eöß to manoe, heß a neoß ah ta ruen köß kaak.” 8A tah pamëh to tavus pa ö no ma vamomhë peß to nö vöön pa vavoen taëën.
9E köövo va Samëriaß to soe ke Ieesuß pan, “Eën to vatoksean a neoß pa ö nën to hin a neoß a ruen to kaak. Suk eën a to Jiuß ke eöß a köövo va Samëriaß.” E köövo to soe suk vamanih, a napan va Israël to hikta vamomhë me ne sih a napan va Samëriaß.
10Ke Ieesuß piun a soe pe köövo va Samëriaß, pareß soe pan, “Eën nat e nom po heß pe Sosoenën ëh? Eën nat me e nom pa teß vëh to hinhin ruen a nom oah to kaak, ha? Eën se hin eah a ruen keß heß en pën pa ruen va po toßtoß tamoaan.”
11Ke köövo soe ke Ieesuß pan, “Eën se kon taneß maß a ruen va po toßtoß tamoaan nih? A koveß ruen vëh to parin a ruruvun, kën hikta teß me nom ta tah nën se kan taneß na a ruen manuh pa koman a koveß ruen pamëh. 12A tasun pën apuh oah kës e non pa teß tasun pe sipuura Jekop? E Jekop to heß voh en pemöm pa koveß ruen vëh. A koveß ruen vëh nee to kakaak voh ne me ro pus koaß peß, me ra ma tah mamakën pee.”
13Ke Ieesuß piun a soe pe köövo pamëh, pareß soe pan, “A napan kurus to kakaak taneß ne sih manih pa koveß ruen vaßih, ee se haharaß avoeß e ne po manoe. 14Ivëhkëk, ta pah teß se keh kaak a ruen vëh nöß se heß eah, eß to hikta onöt non a haraß hah o manoe. Ka ruen vëh nöß se heß eah, eß se tavus en a ruen to vuvu non manih pa komaneah. Ka ruen pamëh se puh tamoaan e non manih pa komaneah, ko heß e non peß po toßtoß tamoaan.”
15Ke köövo pamëh soe ke Ieesuß pan, “Sunön, heß a neoß ah a ruen pamëh, köß kakaak noß ko hikta se haraß hah noß o manoe, me eöß hikta se nönö vatëh noß maß pa isisu ruen manih.”
16Ke Ieesuß soe ke köövo pamëh pan, “Vos ah vöön parën vaoe maß e voe manot pën köm nö maß manih pom.”
17Ke köövo soe ke Ieesuß pan, “Eöß to hikta teß me noß ta voe.”
Ke Ieesuß soe ke poan pan, “A soe pën a man, pö nën to soe ka neoß pan eën to hikta teß me nom ta voe. 18A soe pën to teß man e non, suk ataeah, moaan voh nën to me voh nom a tönim voe. Ka teß voe vëh nën to teß me nom kuru, eß to hikta teß non pan eß e voe vamaman pën.”
19Ke köövo soe pan, “Sunön, kuru eöß to nat eoß pën a teß vanënën soe. 20A kën sipunmöm to tötönun ne sih pa tope vëh, ko vasunön ne e Sosoenën. Ivëhkëk, eöm varih a napan va Israël to sosoe nem sih pan, a ö tötönun pea ivöh Jerusalëm pa vasunön e Sosoenën.”
21Ke Ieesuß soe ke köövo pamëh pan, “Köövo, vaman a neoß ah. Eß to teß non o pöh poen se tavus amot maß ne eöm hikta antoen nem a tönun pa tope vëh, paröm vasunön e Tamön. Eöm me to hikta antoen nem a nö manuh Jerusalëm pa vasunön eah nën”. 22Ke eom varih a napan va Samëriaß, eöm to vasunön nem a teß ne eöm to hikta nat vavih nem eah. Kemöm varih a napan va Israël, emöm to nat e nem peteh nemöm to vasunön nem eah sih. Suk ataeah, emöm a napan va Israël, emöm to onöt e nem pa vamaaka ke ra napan a ö ne Sosoenën se kon taneß hah raoe manih pa taateß hat. 23Ivëhkëk, kuru no o poen to tavus vahik en. Ka napan varih to kehkeh vasunön ne e Tamön, ee se teß rakah me ne o kikis pa Tuvuh Vasioß, ko vasunön ne poë, pare vavatet ne a soe peß. E Tamön to taum en pa pap teß to teß va ne nën se vasunön ne poë. 24E Sosoenën a Tuvuh, ko teß varih to vasunön ne eah, ee se vasunön rakah eah manih po kikis pa Tuvuh Vasioß, suk ataeah, eß e Sosoenën vamaman.”
25Ke köövo soe en pan, “Eöß to nat e noß pa teß vëh na to popokaß no eah e Mesaëaß, eß e Kristo, eß to nö voh maß ne Sosoenën to vanö maß poan. Ka teß pamëh se vavaasis a ra pa ma moeh tah.”
26Ke Ieesuß piun a soe pe köövo ko soe pan, “Eöß akuk kuru ivëh e Kristo, a teß ne Sosoenën to vanö voh maß to vavaato me e noß pën”
27A ma vamomhë peß to taneß hah maß vöön, ko toksean rakah ee pö nee to ep in e Ieesuß to vavaato me non e köövo pamëh. Ivëhkëk, ahikta paeh va pee to hi va in e Ieesuß manih pan, “Eën iu nom ataeah?”, keß, “Eën vavaato suk me nom e köövo vëh ataeah?”
28Ivëh, ke köövo pamëh këh en pa nöh isisu ruen peß to pet non pa koveß ruen, pareß vos en vöön ko soe ke ra napan pan, 29“Nö kurus maß öm paröm ep pa teß vëh to vavatët vahik rakah en peöß pa ma tah nöß to nonok voh noß sih. Eß pöß e Kristo a teß vëh ne Sosoenën to soe voh pan eß se vanö maß poan, ha?” 30Ka napan tënan vakomanih, pare këh ee pa vöön pamëh ko nö ee pa ep e Ieesuß.
31Manih pa poen pamëh no a ma vamomhë peß to soe ke poë pan, “Tövavaasis, ëën voh ah.”
32Ivëhkëk, e Ieesuß to piun rapoë, pareß soe en, “Eöß to teß me e noß pa taëën nöß se ëën, nöm to hikta nat nem.”
33Ivëh, ka ma vamomhë peß vaiihi koman e ne pan, “Eß to teß pöß non ta teß to teß ke vu maß poan ta ma taëën?”
34Ke Ieesuß soe ke raoe pan, “A taëën peöß ivëh pan, eöß se nok voh a kiu pa Teß vëh to vanö voh a maß neoß, keß hik vavih voh. 35Eöm koman to sosoe nem sih pan, ‘A taanaß sivö to meß avoeß e ne pa tavus maß, ko poen oes a voaß tavus en.’ Eöß to soe vaman rakah keoß peöm pan, kuru a voaß to vamatop ee pa oes, ivëh, köm se iniinan vavih voh manih pa koman a rak. ▼
▼E Ieesuß to ep a napan va Sikar to nö maß pa ep poë. Ivëh, neß to vatvus suk a soe vapipinoß manih pa voaß to vamatop ee pa oes. A voaß to vamatop ee to vëknom non a ma kupu pa napan to vamatop ee pa vatet a soe pe Ieesuß.
36A ma teß varih to kiu ne pa oes a voaß ee se kon ee po voen pee. Ko voen pa ma teß poë varih, ivaßih, ee se rëh o kokoman pa napan, kee kon ee po toßtoß tamoaan. Ivëh, ka teß vëh to nep a voaß me a teß vëh to oes, ee pon se vaeö rakah. 37A soe vaßih a man, ‘A pah teß to nep a rak, ka meh teß ivëh to oes.’ 38Eöß to vanö a neöm pa oes a voaß varih po tökiu vëh nöm to hikta kiu voh. ▼▼A soe vëh to vamaaka maß a ma teß vanënën soe vamoaan voh, me a ma vamomhë pe Ieesuß. A ma teß vanënën soe ivarih to nep voh a voaß manih po tökiu, ka ma vamomhë pe Ieesuß, ee o teß to oes a voaß varih po tökiu.
O upöm teß to vamatop momoaan a ma kupu pa napan, köm suk maß ko vamaaka a napan poë varih a hanan va pa kon o toßtoß tamoaan.”39A nap peo va pa vöön va Samëriaß to tënan a soe pe köövo, pare vaman rakah ee pa soe pe Ieesuß. Suk e köövo to soe ke ra napan a ö ne Ieesuß to vavatët vahik en peß pa ma taateß neß to nonok voh non. 40O poen no a napan va Samëriaß to nö maß manih pe Ieesuß, ee to hi poë pan, eß se teß vaßpeh me voh raoe pa ma siß poen, ke Ieesuß teß me en pee po pöök poen nën. 41A nap peo rakah to pënton a soe pe Ieesuß, pare vaman poë.
42Ee to soe ke köövo pan, “Vamomoaan nemöm to pënton a soe pën, pamöm vaman em pe Ieesuß. Ivëhkëk, varuß vakomanih nemöm to vaman suk emöm koman to pënton em peß. Pamöm nat em peß a teß se kon këh a napan va po oeh vëh pa hat.”
E Ieesuß To Vatoß Hah E Koaß Oeteß Pa Teß Kikiu Pa Teß Sunön
43O pöök poen to oah ee, ke Ieesuß këh en pa muhin va Samëriaß, pareß nö en manuh pa muhin va Galiliß. 44Manih pa koman a muhin va Galiliß ne Ieesuß to soe voh pan, “A teß vanënën soe to nö, ka tavöön koman peß heß tonun ee peß, pare hikta ta ne poë.” 45O poen neß to tavus hah manuh pa muhin va Galiliß, ka napan va pa muhin pamëh vaeö suntan rakah ee peß. Ee to vaeö suk ne poë pa ö nee to ep voh a ma tah vatoksean neß to nonok voh non manuh Jerusalëm po poen apuh va po Pasovaß.46E Ieesuß to vos en manuh pa vöön va Kenaß a vöön pamëh to teß non koman a muhin va Galiliß. A vöön pamëh neß to rih voh a ruen keß tavus en o voaën, ka pah teß susun pa teß sunön to teß non pa vöön va Kapaneam ne sunaißeah to haraß suntan a hivaß. 47A teß susun pamëh to pënton a soe to soe non pan e Ieesuß to taneß maß pa muhin va Jiutiaß, pareß nönö non maß manih Galiliß. Eß to nö manuh pe Ieesuß, pareß soe ke poan pan, eß se nö maß Kapaneam ko vatoß hah e sunaißeah. Suk ataeah, a siß ö hat keß mët en.
48Ke Ieesuß soe ke poan pan, “Eöm varih se keh hikta ep in ta tah vatoksean me to vëknöm, eöm to hikta onöt nem a vaman.”
49Ka teß susun pa teß sunön soe va in e Ieesuß manih pan, “Sunön, vëvëhöß mah, a siß ö hat ke koaß peöß mët en.”
50Ke Ieesuß soe ke poan pan, “Hah na, e sumuißah se toß hah en.”
Ka teß susun pa teß sunön vaman en pa soe pe Ieesuß, pareß hah en manuh pa vöön peß. 51A teß susun pa teß sunön to teß avoeß e non hanan ka ma pah teß kikiu peß nö maß, pare akeh poë manih hanan, pare soe ke poë pan, “E koaß pën to toß hah en.”
52Ka teß susun pa teß sunön hi a ma teß kikiu peß pan, “A potan teß rakah non nih ke koaß peöß vih hah?”
Kee piun ko soe pan, “Nopoen pa 1 kirök no a kamis pasun to hik këh poan.”
53Ke tamaneah nat hah en pa tëëm totoopin rakah pamëh ne Ieesuß to soe ke poan pan, “E sumuißah se toß hah en.” Ivëh, ka teß susun pa teß sunön me ra napan kurus varih to teß ne koman iuun, ee kurus to vaman ee pe Ieesuß. 54Ivaßih a vapöök tah vatoksean neß to nok manih pa ö neß to këh maß a muhin va Jiutiaß, pareß teß non manih pa muhin va Galiliß.
Copyright information for
TPZ